Peter Place straat, Bryanston
verby ‘n luukse motorhandelaar
verloop hierdie straat
verby ‘n maer man met ‘n trollie
waarmee hy rommel vergaar
verby advertensies vir skoonheidsprodukte
(vir die oorsensitiewe vel)
verby die Oorinstituut en pasmaak ortodontis
met verderaan die uithangborde van NRO’s
wat maan teen verkragting en gesinsgeweld
of vertel hoe om koolstofkrediete te verdien
reg voor die aborsiesentrum protesteer
‘n groepie kerkgangers met hul banier –
“gun my die gawe van lewe”
net langsaan is daar ‘n onvrugbaarheidskliniek
blykbaar wêreldklas met in-vitro swangerskap
Red SA, lees die verbleikte verkiesingsplakkaat
© Jakes Möller, 2025