Sokrates
kaalvoet, in vodde, maar innerlik skoon
op die markplein van Athene het hy
– as méés wyse deur die orakel bekroon –
met vlymskerp-vraag hul na waarheid gelei
onsterflik siel ontspring vanuit God
wysheid en kennis uit hemelgewelf
geweeg geweeg die mens se gebod
te lig te lig sy kennis van self
Zeus is bespot besluit vyfhonderd man
korrup is die keur van ons land se jeug
sterf nou!…óf, word in skande verban
die dood is my lot verklaar hy met vreug
‘n beker met gif is vir hom geskink
was sý dors geles na hy dit drink?
© Stephan du Toit, 2025