Bestekopname
Kennisse, kasuele vriende,
nabye en lewenslange verbintenisse
aangeteken neffens liefdesversakings.
Die familieboom staan ook hier
in konfessies, kaarte en konterfeitsels
met vriendskappe soms durend, ander verby.
Om iemand te versaak of verlaat, ontydig.
On-min in die huis van die digkuns dan …
Sommiges word jou stil bloedsomloop:
verstaan mekaar woordeloos
in tye van ‘n noodluik, aldus onse Eybers:
“elke slot moet die kiem bevat van ’n nuwe begin”.
En sy sou weet dat al wat oorbly
die soeke is na die regte woord, iets soos
om jou te verweer téén selfverwyt: so eindeloos.
© Joan Hambidge, 2025