Ushabti
JdL
Vanoggend herdenk
ek jou eerste verjaarsdag
weg; verloor my pen bykans
in die wasmasjien.
Die tyd tik meedoën-
loos aan sonder jou
in nagte slaaploos:
dan sluwe, somber drome.
Al Pacino meen daar
is geen stut vir
die psige beseer
in Scent of a Woman.
Verlede jaar geskenke
geneem: blomme,
slaappille en ‘n stapel
boeke van skryfvriende.
Ek plaas ‘n ushabti
(gemaak van hout)
in jou grafkelder:
‘n Algebra van nood.
Die meeste sterre
is beslis nie dood.
Ek plaas daardie pen
langs al jou boeke
neffens Cavafy:
“I’ll go to another country,
go to another shore,
find another city better than this one.”
© Joan Hambidge