Desembergedig
Lewe in oorvloed
Hierdie is die dae van die ryp waatlemoen,
van pynappels en mangoes,
dis druiwe- en aarbeiseisoen.
Die janfrederikke ryg hul liedjies aan mekaar.
Honger vir die lewe is die
babamossies aan ‘t rittel en bewe.
Kapppertjies en salies, malvas en gesiggies
vorm ’n vrolike koor van kleur.
Die krismisrose blom. Bye baljaar.
Die beddings is bont, die bome is groen.
Laat dít hierdie Advent ons droom wees, Heer:
u lewe in oorvloed
waar hoop geil groei,
waar u vrede soos die lawende skaduwee
van digte lower oor ons hang.
Laat die soet vrug van u liefde bloei.
Laat u vreugde blom.
© Neels Jackson, 2025