Road Rage
As verdrukking die moeder
van die metafoor sou wees
soos Borges eens beweer
sien in my truspieël links
‘n motor se ligte flitsend
(gee pad gee pad gee pad)
vir sy 4X4 druk my vas
in ‘n baan met ‘n aankomende
4X4 (ry teen ‘n oprit in)
kyk toe hoe die twee manne
stry skel skreeu oor wie
mag ry in die nou steeg
oorkant ‘n park Vrydagaand
teen dusketyd gee pad
gee pad gee pad woede
tasbaar voelbaar hoorbaar
déséspoir vreemdklinkend
nes nommerplate registreer
besoekers uit ‘n ander plek
oppressie depressie repressie
stop! Slaan my oë op na
die groot berg brandend
blus die vuur in hierdie gedig
die blinde digter Borges
had gelyk ‘n metafoor
die moeder van alle
teenstand.
© Joan Hambidge, 2026