Vaart op die Li-rivier
Ons vaar op die Li-rivier
na ’n plattelandse dorpie —
die kalksteenvingers van China
asemrowend om ons
en hy, ’n vrypostige mikrofoon,
verbind die kalksteen
wat uit die rivier rys
met ons jong Chinese toergids
sy, lank en slank van die Noorde —
“die Suide se Chinese is korter,” vertel sy,
maar hy hou aan — ondervra haar
soos die Security Police oor die politiek
“Ons is vry,” sê sy, maar ek sien haar gevange oë
hoe sy soos ’n waterbuffel in moerasland wei —
versigtig om geen spoor te laat
vir geheime gespitste ore nie.
Na ure se vaart klim ons verstom
by Yangshuo af, waar
die inwoners 365 dae van die jaar
waterteater speel
en sy hom uiteindelik
soos waterdruppels
van haar kan afskud.
© Marthé McLoud, 2026