Eekhoring
(Ina Rousseau)
Vroegoggend klop ‘n eekhoring bruin
aan die voordeur met ‘n boodskap
in sy klein pootjies biddend: ‘n verweer.
Jare gelede in haar digterstuin
skaai ‘n parmant in eendeweer
‘n vers onklaar vol spelde en naalde.
Waarna soek hierdie alleenloper?
Eerbiedig knik hy sy koppie en sê ame,
skarrel dan weg, soekend na ‘n uitgang.
Snags, só beweer my nurkse buurman,
‘n geraas en gedans in die kompleksdak
vol kwinkslae, kwelsug and all the rest.
Voltooi gerus nou hierdie gedig tot u gerig:
dalk iets soos blikaspaai, bliksemskigtig,
blikoor, blikker, daar is meer vrae as sinne?
Dié eekhoring steur sig bloedweinig
aan ‘n bidsel (biesie biesie bame)
vertrek met ‘n blanko vers vol stopnaalde.
© Joan Hambidge, 2026
Onderhoudend!