Maar waar is die sneeu van voorverlede jaar?
My wetenskap-onnie in Standerd nege
verduidelik sneeu is net waterdamp
wat vries in die lug en kristalle vorm
in ‘n yskille Standerton in die ou Transvaal.
Maar waar is die sneeu van voorverlede jaar?
Van “Mais où sont les neiges d’antan!”
sou ek later via Uys Krige verstaan
in sý vertaling van Francois Villon
met ‘n Franse dosent, ‘n Belg, vergewe.
Maar waar is die sneeu van voorverlede jaar?
In ‘n ysige winter in daardie New Haven
op ‘n aand lees ek Wallace Stevens
met ‘n wind se kristalle teen die glas
van Yale se biblioteek vol wonderwerke.
Maar waar is die sneeu van voorverlede jaar?
Lank ná middernag gejas en gestewel
uit ‘n filmhuis my eerste sneeu ervaar:
die klankloosheid, die absolute stilte
toe iets uitbreek in my woordkristalle.
Maar waar is die sneeu van voorverlede jaar?
‘n Gewone aand was dit bepaald nie.
Opperman se raad oor Wallace
sou perfek saamkom in my antwoord:
geweld van binne beskerm teen alle stiltes.
Maar waar o waar is die sneeu van voorverlede jaar?
© Joan Hambidge, 2026