De Waal Venter. Werklik onwerklik
Werklik onwerklik
Baie mense dink,
sê professor Faag,
dat die werklikheid bestaan
as ‘n entiteit
wat bepaald en goed omskrewe is.
En dit is nie?
vra ‘n student,
‘n stewige industriële stewel,
een van ‘n tweeling.
Nee, antwoord professor Faag,
die werklikheid is in werklikheid stelle persepsies
wat deur jou denke flits
en nooit dieselfde is nie.
Beteken dit laasnag was nie werklik nie?
vra ‘n ander student, ‘n pragtige rooihaarmeisie,
met ‘n hunkerende klankie in haar stem.
Net in die sin dat laasnag
in verskeie vorme voorkom
in die huidige werkinge van jou denke.
glimlag professor Faag.
Met alle respek, professor,
sê ‘n ander student, ‘n renosterbul, met ‘n frons.
Hy skuif in sy sitplek
wat pynlik kraak.
Daar is laasnag op my geskiet
en ek is lig gewond –
hy vryf sy linkerskouer –
en vir my is laasnag baie werklik.
Ek is seker dit lyk vir jou so, Theodosius,
sê professor Faag simpatiek.
maar wat jy nou ervaar
is jou wond, nie laasnag nie.
Met ander woorde die werklikheid hou aan verskuif?
vra ‘n ander student, ‘n vlekvrye staalkastrol,
en versit sy deksel
met ‘n klein, maar helder diepklank.
Jy dink nog steeds daaraan as ‘n entitiet, Pablo,
reageer die professor.
Die werklikheid is nie ‘n film met ‘n geordende volgorde nie,
dit bestaan net wanneer dit nie bestaan nie.
Die professor is meteens nie meer daar nie.
Net ‘n intieme kledingstuk bly agter,
en niemand wil dit ondersoek nie.
© De Waal Venter. 2013
