Stol
Ons sou altyd in ons twintigs wees:
my hare klein sluiers teen my wang,
jou duime wat dit wegvee,
die see wat die horison brand.
Ons sou altyd in ons twintigs wees,
en saans vir mekaar by die voordeur wag
met sjampanje die kleur van sykouse
teen die kurwes van ‘n langsteelglas.
Ons sou altyd dertig wees
en rose om ‘n popgesig rangskik
om pienk gepoeierde foto’s te neem.
Riviere sou ons skommel in ‘n goue biesiemandjie
altyd twintig, of dertig,
maar op veertig stol ons
tot troebel gelatien en vet;
die hoender het alweer gebrand.
© Marieta McGrath, 2022