Besoek aan die eiland Iona
(Skotland)
Die veerboot dreunkreun van Mull na Iona.
Ons kykers kry ’n vasvatgreep op die omgewing –
die eiland van vervreemding waar die
Gees van God reeds vir geslagte sweef.
Nou staan die huisies klappertand gejas, die trekvoëls vort,
net ons, die swaeltjies van die Suiderrond
migreer om enkeldiep in koue mieliepap te sak
en ysnaaldsweet van wenkbroue te vee.
Die Vinger van God troon bo die dorpie uit.
Die kinders kamp op kloosterbanke uit,
neem lawwe foto’s van mekaar en lag gedemp.
Ek vrees vuurvlamme en die wraak van God.
Laatmiddag neem ons die laaste veerboot terug.
Ons motor gly gevaarlik op die pas
ruk ons tot teen die ewigheid, maar die Gees
van God het ook tot hier gesweef.
© Marthé McLoud, 2023