Springgety (1975)
Die see is ‘n trop wildehonde.
Vreesaanjaend storm hulle op ons af.
Ma se skouers lyk soos ryp waatlemoen
“Gaan roep jou broer ek wil ry.”
Die branders hap-hap aan my enkels
soos voorbarige keffertjies.
My broer swem in die voorste linie
met sy rug na die strand gekeer.
My broer swem doer anderkant
saam met ‘n trop wildehonde
hulle hondsdolbekke skuimend wit.
Hulle ruk my rond met hulle slagtande.
Ek tuimel tussen branders.
Ek moet my broer gaan roep.
Ek gil en skreeu op hom
soos ‘n korporaal op ‘n troep.
My stem skeur repe in sy rug,
maar hy kyk net eenmaal terloops terug.
© Marthé McLoud, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.