Johann van der Walt. kies jou eie titel en plaas dit hier

 

 

kies jou eie titel en plaas dit hier

 

op ‘n stoep in paulshof – dié openbaring:

ek voel soos ‘n genuine fokken poet

danie sweer dit op die goedkoop dooswyn langs die stoel

sê dan hy voel pretentious nes afrikaanse poets

met dié vra ek hoe ‘n digter dan ‘n front voorsit

want die woorde voel gepas op hierdie aand

so asof dit nog altyd op die bodem van sy glas opgekrul was

sy oë glaserig teen die draai van indringerige hoofligte

’n skerp gelaster van ‘n bmw wat die sirkel buite die kompleks skil

dan spat danie se antwoord verby sy lippe

so asof daar ‘n dubbelpunt vanself gaan volg

poets glo mos afrikaanse digkuns kan slegs oorleef

binne die perke en reëls wat die toppe jare terug voorgeskryf het

hy sê digters dink hulle is ‘n klub van konserwatiewe elites

digters speel pretend dat alles steeds okei is in afrikaans

glas skaars kafgedraf skink hy weer sonder verskoning

hy sê hy pretend vanaand dat hy ook is okay is

nes afrikaanse poetry

maar die dringendheid van sy stem verklap die moontlike resultaat

dis waar, dinge kan nie so aangaan nie

sy gesuipery gepaard met die pretend to be fine

sonder verandering sál iets boet

vieslik ook

óf dit danie is

óf dalk afrikaanse digkuns

weet ek nie

 

© Johann van der Walt, 2024