Op nommer 99
Laer trek reeds saam soos
Revolusie bruis;
Klapperkop kanonne word gelaai
Met reklame-bomme terwyl
Beeldstormers (ook Calviniste)
Hoog raak op hul terpentyn.
Sal daar vir gewone toeskouers
Van skaamte en skaamteloosheidsvertonings
’n Tent wees vir refleksie,
Tussen miskenning en oordrewe verering,
Tussen grensloosheid en grensoorloë,
Tussen Kaaping en Apartheid;
Weg van die spookasems?
Deursnit feesgangers:
Die met kaartjies maar geen parkeerplek,
Wat mag oorslaap maar nie kan bly,
Nie verwyl in idee-konsentrasiekampe,
Feuertrunken op die brande-wyn,
Nie eens is met verskroeide breinsel-beleide.
As daar iets is om te vier –
Is dit inhoud eerder as uitset?
Nie mense nie maar ’n taal,
Iets minder dalk as Groot
Maar ook meer as niks?
Sodat die taal weer anders kan word as slegs fees en vertoning
Maar weer werklik en gewoon.
© Hercules Boshoff, 2024