Lamsvleis
everyone gets eaten
as the rabbit said
to the animal psychic – Leonard Cohen, Lambchops
Dat ‘n hele lot van Jesus se dissipels
in Johannes 6:66
net daar omgedraai het huis toe –
“Nou word dit regtig weird.”
“Dit moet een of ander siek kultus wees.”
“Kannibalisme? ‘n Seun van God wat vra dat ons hom eet?”
walg hulle aan verbeelde mensbloed,
aan soet mensvlees, taai vesels tussen tande,
brand die gril in hul kieue –
dit neem ek hul nie kwalik nie.
Ek sou ook.
Maar nou dra Leonard Cohen
se dierespiritis die boodskap oor:
“Haas of nie haas nie,
ons almal word uiteind’lik opgeëet.”
Iemand moet geëet word.
© Marieta McGrath, 2024