Anne-Marie Bartie

 

Donkergat

 

op die yl agtergras

waar ek krummels gooi

staan my liggaam bloots

teenoor vergunning,

die skone edelbeeld

van ‘n rooioogduif

se vaalblou dons

 

roekoek ‘n paradoks

van die geskifde veer

– wat immers ‘n offerhande

uit die Ou Testatment is –

versus my onvermoë

om rustig, rein te wees

óf te onderskei,

perspektief te sien

tussen dit wat aards is

en wat aan Hóm behoort

 

ek bevind myself

Jesebel

in Donkergat

 

© Anne-Marie Bartie, 2024