Santiago de Camino Compostela
die voetval van die pelgrim
loop deur die slagaar
van die veld
‘n skaam beek
omhels die heuwels
die landskap se vlegsel
netjies met ‘n wit lint
vasgebind
kaboutereter-kewers, bondeldraers en ‘n eensame kakkerlak
luister aandagtig
na die geruislose voetval
van ‘n boetgesant
‘n ooievaar bring tyding van verlies
eersteling doodgebore
wilde laventel en bitter olyf
huil in die wind
‘n paar trane verder
krabbel donkie-ore
‘n minotaurus en volborstige meisies
in die grond
© Christiaan Diedericks 2024