die laaste dans
nadat die digter klaar gepraat het
het hulle hom in `n koue kis gebêre
in die biegvader se tuin in die verre noorde
ingebed in bekende
vreemde woorde oorwelf deur die dowwe
sterre van `n ander hemel
waar die heerskare dooies
rus vir hul siele kan vind
maar geduldig staan dapper en stapper
op wag op die kis
twee rooies uit Wupperdal se wyk
wat wonder en kyk wat die volgende stap
dan nou is:
en hy sal sy skoenrieme vasmaak
hy sal opstaan
en onder die bleekgesigmaan
na die huis van sy vader
in die suidhoek toe gaan
die skoene sal hom dra oor die groot oseaan
oor berge en dale en die breë rivier
sonder end
tot waar die tuinhekkie knars
en die lied van die nonnetjie-uil
uit die solder hom roep
en dan sal hy jubel en juig
hy sal rittel en trippel en wapper en wuif
en hy sal dans dat die stof so staan
Gunther Pakendorf
Desember 2024
Besonders.