Assessering
ʼn Rubriek is ʼn rubriek, maar ís dit wat dit is?
Wie té stip sou staar sit die pot dalk mis?
Wit is wit en grys is grys, water lyk soms op ys –
wie wil graag die ysberg wys?
Dinsdag 1 Julie 2025, 14:22
Aan: Dr. H. Fürstenburg
Onderwerp: Honneursstudent se rubrieke terug
Geagte Dr. Fürstenburg
Ek heg met ʼn skeut huiwering,
maar in lyn met kundige pedagogiek,
die drie rubrieke
van u student se aanbieding aan.
Ek wil bevestig
dat ek dit enigermate vreemd vind
dat Dr. Edeling se punt
relatief laag is – séstig,
wat ongunstig vergelyk
met die ander assesserings –
beide tagtig, geen geringe verskil nie,
van Prof. Delport en Dr. van Wyk.
Met vriendelike groete,
Dr. Anton Cloete
Dinsdag 1 Julie 2025, 16:02
Aan: Dr. A.P. Cloete
Onderwerp: Honneursstudent se punte
Geagte Dr. Cloete
Dankie vir kranige werk tydens
en na die aanbiedings.
Daar is iets wat my pla,
so ek wil vra
of u opmerk die blokkies van Dr. Edeling se rubriek is leeg,
sonder aanduiding dat die kriteria deeglik oorweeg is.
Sy punt is skynbaar uit die duim gesuig;
lyk dit vir u ook of die reëls gebuig is?
By aanbiedings is ons Assesseringbeleid
uiteraard bepalend, veral deursigtigheid;
om dinge te verdoesel, lyk onbillik,
of – behoede ons – oneerlik.
Boonop is daar ʼn enkele opmerking:
“Die sub-vrae van die navorsing is ʼn groot beperking.”
Genoemde dosente is op standaard;
Dr. Edeling, daarenteen, laat my beswaard.
Met hartlike groete,
Dr. Hendrik Fürstenburg
Dinsdag 1 Julie 2025, 17:42
Aan: Dr. J. Edeling
Cc: Prof. D. Delport; Dr. D. van Wyk; Dr. H. Fürstenburg
Onderwerp: Rubriek van Honneursstudent terug
Geagte Dr. Edeling
Ag kollega, dit spyt my,
ek moet ʼn saak van die bors af kry.
Ek doen dit met aarseling:
u rubriek roep om verbetering.
Die kwessie is gewigtig;
al voel ek effe skigtig
wil ek hoflik vra of u tog,
as dit u geval, nog ʼn slag
na u rubriek sal kyk en toepaslike
punte in die onderafdelings intik?
Die totaal moet optel tot sestig –
dis dán eers geldig.
Met hartlike groete,
Dr. Anton Cloete
Woensdag 2 Julie 2025, 8:43
Aan: Dr. A.P. Cloete
Cc: Prof. D. Delport; Dr. D. van Wyk; Dr. J. Edeling
Onderwerp: Onvolledige rubriek en teleurstelling
Geagte Dr. Cloete
Om nóú punte in te voeg, sal nie doen nie;
dít is nie met aanvaarde praktyk te versoen nie.
Ek blý onvergenoegd dat die onderafdelings leeg is;
ek twyfel of dit oorweeg was.
Die aansienlike verskil pla steeds –
u het dit reeds uitgewys.
Ek wil voorstel dat u
Dr. Edeling se punt ter syde stel.
Met vriendelike groete,
Dr. Hendrik Fürstenburg
Woensdag 2 Julie 2025, 10:22
Aan: Dr. H. Fürstenburg
Cc: Prof. D. Delport; Dr. D. van Wyk; Dr. A.P. Cloete
Onderwerp: Teleurstelling en woede
Geagte Dr. Fürstenburg
Ek het u e-pos met teleurstelling
ontvang, met ʼn opwelling van woede.
U was agterbaks om sodanig te kommunikeer;
van kollegialiteit moet u nog heelwat leer.
Ek wil u daarop wys dat die rubriek deels verkeerd is;
iemand soos u, wat tog ver geleerd is:
sou mens die onderafdelings bymekaar tel,
is die totaal honderd-en-twintig; moet ek dit eenvoudiger stel?
U is arrogant om opdragte uit te deel;
u sal u nogal wat verbeel.
O, dan ʼn laaste mededeling:
hierdie universiteit is ʼn wêreldklas-instelling.
Met hoogagting,
Dr. Janus Edeling
N.s. Dr. Cloete, ek heg die volledige rubriek aan, ek verpes die ding.
Woensdag 2 Julie 2025, 13:22
Aan: Dr. J. Edeling
Cc: Prof. D. Delport; Dr. D. van Wyk; Dr. H. Fürstenburg
Onderwerp: Verwys rubriek weer terug
Geagte Dr. Edeling
Ek het voorbehoude:
u punt is verwronge;
ek moet u noodgedwonge wys
op brutale foute.
U het vyf punte toegeken by “Inleiding” –
in die blokkie vir sewe tot agt, en dan,
onder “Doelstellings” het u sés; dit kan tog nie?
Verder wil ek u wys op die fout by “Aanbieding”.
Ek voel verleë om u teleur te stel:
die rubriek se totaal is inderdaad reg.
Dr. Edeling, ek voel sleg
oor wat hier gebeur het,
maar, gesien dié rubriek, ingedien deur ú,
is ek nou redelik sku
om u punt te aanvaar;
die gevaar –
wat die saak bemoeilik –
is dat ons, indien ons u punt verreken,
ʼn knoeiery sou vergoeilik
en dan stuur ons daarmee ʼn verkeerde teken
omtrent dié wêreldklas-universiteit.
Ek besluit dus met spyt
om u punt tersyde te stel,
maar ek stuur wel
warm groete.
Vriendelik die uwe,
Dr. Anton Cloete
Donderdag 3 Julie 2025, 8:22
Aan: Dr. A.P. Cloete
Cc: Prof. D. Delport; Dr. D. van Wyk; Dr. H. Fürstenburg
Onderwerp: Korrekte rubriek aangeheg
Geagte Dr. Cloete
U het my daarop gewys dat my rubriek verkeerd is.
Ek hoop nie u dink dat ek daardeur ongeleerd is nie.
Die gestuurde rubriek was net ʼn rowwe stuk werk;
ek het hierdie rou poging nou ruim versterk.
Ek heg die rubriek aan – met korrekte punte omkring.
Groete,
Dr. Janus Edeling
Vrydag 4 Julie 2025, 8:45
Aan: Dr. J. Edeling
Cc: Prof. D. Delport; Dr. D. van Wyk; Dr. A.P. Cloete
Onderwerp: Groottotaal bekyk
Geagte Dr. Edeling
Kom ons kyk na die groottotaal.
Sou u gewillig wees om ten enenmaal
te bekragtig:
tel die rubriek uit honderd, of honderd-en-twintig?
Met vriendelike groete,
Dr. Hendrik Fürstenburg
Maandag 7 Julie 2025, 17:14
Aan: Dr. A.P. Cloete
Cc: Prof. D. Delport, Dr. D. van Wyk, Dr. J. Edeling, Mev. A. Odendaal
Onderwerp: Tyd het hom ingehaal
Geagte Dr. Cloete
Dr. Edeling het nou dae gehad om my vraag
te beantwoord. Ek het hom uitgedaag
om die totaal te bevestig.
Ons móét weet hoe hy gekom het by honderd-en-twintig.
Ek twyfel of hy gáán.
U mag wonder: waarom dring ek aan
op bevestiging van die groottotaal?
Raak my argument kant nog wal?
Laat my verduidelik: om te begryp
hoekom hy so stil is, is die tyd nou ryp
om te gaan kyk na sy vorige e-pos:
u sal onthou dat hy mos
op neerhalende wyse geargumenteer het
dat die rubriek uit meer as honderd tel en so probeer het
om my navraag en voorstel belaglik
te laat lyk, maar toe vergat hy sy naam ontsaglik.
Nou raak dit duidelik dat hy my ʼn verskoning skuld
en ek wag geduldig,
maar om “ekskuus” te vra is integriteit nodig –
en dít het hy nie, want hy blý mý verwyt.
As hy nie sy punt verklaar nie
kan ons dit beswaarlik aanvaar;
ek wil boonop graag
opvolg met ʼn nuwe vraag:
u is ʼn wiskundige: u sal dus weet
ek hét ʼn punt hier beet:
die rubriek tél honderd, dít het u bevestig;
ek voel dus op dié vraag geregtig:
hoekom, as hy dag dat dit te groot is
ʼn punt uit honderd neerskryf? Wat hier ontbloot is,
is iets wat ons moet vermy
want dit is duidelik ʼn knoeiery.
Die agbare doktor het besef
dat hy hom misgis het wat die groottotaal betref;
hy moes toe sy fout wanhopig verdedig,
maar sy pogings lyk lamlendig.
Hy moet dissiplinêr verhoor word,
andersins sal ons aansien verloor.
Ek hoop nie nóg studente het gely onder hom nie;
bekyk ál sy assesserings om dít te voorkom.
Ek wil dit duidelik maak dat, wat mý aangaan,
assesserings deur hom nou van die baan is;
ás hy my weer dreig, raak dié saak slegter:
as hý hom kom kry, staan hy voor ʼn regter.
Ingesluit by ons korrespondensie is my prokureur –
sy sal my verteenwoordig in wat verder gebeur.
Dít het ek nou deur dié proses geleer:
kom ʼn man met ʼn stok, gryp jy jou geweer.
Ek bedank u vir u hantering van hierdie saak;
u beginselvastheid het my diep geraak.
Met vriendelike groete,
Dr. Hendrik Fürstenburg
Dinsdag 8 Julie 2025, 7:38
Aan: Dr. J. Edeling
Cc: Prof. D. Delport; Dr. H. Fürstenburg; Dr. D. van Wyk
Onderwerp: Assesseringbeleid
Geagte Dr. Edeling
Ek heg die Universiteit se Assesseringsbeleid aan;
u sal opmerk die regulasies reik wyd,
alles voorskriftelik – om deeglik te bekyk
en dienooreenkomstig te handel; dit blyk
dat u dit weer moet oorweeg. Sien u dat
akademici nie rubrieke moet teken wat
onvolledig is nie? Besef u ook dít kan verder uitkring:
“Akademici mag nie onbehoorlike veranderings aanbring nie”?
Sien u ook dat ons konsekwent moet assesseer en lees u
dat assesserings deursigtig en betroubaar moet wees?
“Terugvoer,” lees ek, “moet tydig gegee word – en akkuraat.”
Dr. Edeling, sien u dat dit u nie sal baat
om u langer te beroep op leuens, beskuldigings
en vae ontkennings nie;
Ek beveel aan u vra Dr. Fürstenburg om verskoning;
ek háát dit om te preek – maar eerlikheid is koning.
Met vriendelike groete,
Dr. Anton Cloete
Dinsdag 8 Julie 2025, 16:17
Aan: Dr. A.P. Cloete; Prof. D. Delport; Dr. H. Fürstenburg; Dr. D. van Wyk
Onderwerp: Ek gee hom nie gelyk
Geagte kollegas
Ek wil reïtereer dat Dr. Fürstenburg ons probeer mislei.
Hy poog nogeens om u sover te kry
om my punt te verwerp. U het gevra dat ek die rubriek weer moet merk;
deur sy teistering het hy my persepsie versterk
dat hy besig is om my te ondermyn;
maar sy rok skyn deur:
hy konkel om my ondergang te bewerk;
ék het nougeset gemerk.
Ek daag hom uit om my aan te kla.
Ek weier ook om hom om verskoning te vra;
ék slaap rustig; daar is habba wat mý pla.
Hy sal nié ʼn apologie kry nie.
Met agting,
Dr. Janus Edeling
Donderdag 10 Julie 2025, 9:32
Aan: Dr. H. Fürstenburg; Prof. D. Delport; Dr. D. van Wyk; Dr. J. Edeling
Onderwerp: Mededeling
Geagte kollegas
Die Assesseringskomitee het vergader.
Ons is enigsins nader
aan ʼn finale oplossing.
Ek wil dié verslag aan u bring:
ons het die Assesseringbeleid geraadpleeg
en dit grondig oorweeg.
Ons het besluit dat die volgende reglemente oortree is:
6.1.1 – dat die verkeerde totaal gebruik is toe die punt gegee is;
8.8 – dat die assessering nie deursigtig en juis was nie.
Dis ʼn oortreding dat die punte verander is – dít druis in
teen 9.6.1. Laastens mag onvolledige rubrieke nie geteken
word nie (12.2.3). Dr. Edeling se punt is dus verkeerd bereken.
Prof. Delport, ek wil dit onder u as Departementshoof se aandag bring
dat die skade aan verhoudings in die Departement nie gering is nie.
Ons moes ʼn besluit neem teen ʼn kollega.
Daar was meningsverskille en ʼn geveg sonder weerga.
Met vriendelike groete,
Dr. Anton Cloete
Donderdag 10 Julie 2025, 13:41
Aan: Dr. A.P. Cloete
Cc: Prof. D. Delport; Dr. D. van Wyk; Dr. J. Edeling; Mev. A. Odendaal
Onderwerp: Re: Mededeling en kabaal
Geagte Dr. Cloete
Dankie dat u die kabaal tot ʼn einde bring.
Al die e-posse van Edeling
het gewemel van persoonlike aanvalle en versinsels.
As sulks was sy verwere en beskuldigings verdigsels.
Ek sou my skaam as ek ʼn student so sou benadeel.
Ek betwyfel weereens sy assesseringspraktyke in geheel.
Ek wil dus opnuut vra
dat sy assesserings ondersoek word – gaan dit deeglik na.
Gesien sy minagting vir die Universiteit
se amptelike Assesseringsbeleid
wil ek voorstel dat hy geskors word
voordat nog tyd op domastrantheid gemors word.
Ek argumenteer dat die saak nie daar gelaat
kan word nie. Het Edeling se sinne hom verlaat?
Dit lyk of hy op ʼn vreemde missie is: selfvernietiging;
hy moet iemand aanstel vir sy verdediging.
Met groot waardering,
Dr. Hendrik Fürstenburg
Vrydag 11 Julie 2025, 06:13
Aan: Dr. A.P. Cloete; Dr. D. van Wyk; Dr. H. Fürstenburg; Dr. J. Edeling
Onderwerp: Mededeling
Geagte kollegas
Dankie vir u korrespondensie oor dié goor saak.
Ek het nie reageer nie, want ek wou so laat as moontlik betrokke raak.
Ek sal dit egter nou opneem met die Dekaan,
Rektor en Menslike Hulpbronne; hierdie saak moet verder gaan.
Met hoogagting,
Prof. Doons Delport
Departementshoof
Donderdag 11 Julie 2025, 16:23
Aan: Prof. D. Delport; Dr. A.P. Cloete; Dr. D. van Wyk; Dr. H. Fürstenburg
Onderwerp: Ongure gedrag
Kollegas
Ek kon nie glo toe ek u e-posse sien nie;
ek het dít nie verdien nie.
Ek werk jare vir dié wêreldklas-instansie –
u optrede pas nie by beskaafde mans nie.
U gedrag was dwaas en onguur.
Waar is regverdigheid hier, wáár prosedure?
Ek beroep my op die Dekaan;
júlle kan almal hel toe gaan.
Maak reg vir ʼn gedugte geveg;
net hoër gesag kan dié saak besleg.
Met minagting,
Dr. Janus Edeling
Maandag 8 September 2025, 16:23
Aan: Dr. D. van Wyk; Dr. A.P. Cloete; Dr. H. Fürstenburg
Onderwerp: Dissiplinêre verhoor en ontslag
Geagte kollegas
Ek dra hiermee met spyt oor
dat dr. Edeling dissiplinêr verhoor is
en dat hy aan growwe wangedrag skuldig bevind is.
Weens sy vyandige gesindheid
en onaanpasbaarheid is sy aanstelling
aan ons wêreldklas-instelling
met onmiddellike effek opgehef.
Mag hy uiteindelik sy dwaasheid besef.
Met hoogagting,
Prof. Doons Delport
Departementshoof
© Jan Pretorius