Vlug
Julle moes voor Ghenghis Khan se Mongoolse horde uit
Afghanistan voor massaslagtings in brandende stede
deur skroeiende woestyne na Nisjapoer en Bagdad
met jul aardse besittings na Kufa in Arabië vlug
waarvandaan jul eindelik Mekka teen die lug
in volle glorie gesilhoeëtteer uit sien staan
om daar dank te bring ook aan jou verlossing
van aardse magte wat die vlees bedreig
waaroor jy soos ’n arend uit moes styg
om op die roepstem van die valkenier te reageer
wat in jou begin ontbrand het.
As bannelinge moes jul deur soveel lande bly migreer
om te oorleef, voor in die Seljoek Sultanaat uiteindelik
in Konya jul in ’n alledaagse bestaan opnuut
in kon burger waar jy gedryf is om te streef na meer
as die verwoestende egostad wat vernietig moes word
om op te gaan in die omvattende liefde van God.
Studerend het jy die slagveld van teks en betekenis betree
waar politieke en godsdienstige leiers gou die doodstraf,
in die chaos van jou tyd, vir afwykendes kon gee
met Shams wat geheimsinnig net verdwyn het
na hy jou gewys het wat sin gee, is om die boeke
met sektariese en leerstellige twiste te verbrand
en vurig suiwer saam te smelt met God se gees
wat jou al spiralend
vlugvoetig op soek
na kosmiese orde
vir ons nog steeds
’n spieëlbeeld van
mistieke deurgang
na ware liefde
kan laat wees.
© Dietloff van der Berg, 2025