Okkitaanse Dagboek
stadswandeling I
die klipbrug loop in ’n boog
oor die Aude – La Cité aan die
anderkant is onttrek uit ons sig
as ons sy aan sy aan
die krom brug begin
’n skitterende helm
doem op uit die ronding
’n breë borskas kaal
sonder malieharnas
’n romp van staalplate
pols- & kniebeskermers om lieflike skarniere
kuite soos rugbyballe bo ooptoon sandale
hy moes sien hoe ek kyk my oë opflikker
– toe ons sig op mekaar kry sleur hy
my mee in die diepte van die Aude
deur sy geamuseerde pupille –
& die man aan my sy?
ag nou ja
onoplettend nonchalant
met die Franse slag
© Carina van der Walt, 2025
stadswandeling II
ons staan langs mekaar by
die stadspoort waar ’n musikant
met ’n puntmus ons in ons spore stop
pinkies ingehaak luister ons na sy 1ste
vuisslae op ’n omgekeerde keteltrom
soos groot seepbelle styg die ronde
klanke op teen die kasteelmure
om 1 vir 1 teen die dakke se
punte te bars 3 musikante
met blokfluite neem sy plek in
fluit ’n vinnige warrelwind & ruil hul
instrumente vir lier portatief stem
die kleintjie bespeel sierlik die lier
met ’n gansveer – die grote streel
met rooi naels sy skootorreltjie
sý het net haar stem
met uitgestrekte arms & oop polse
werwel haar smeking om sy liefde
omhoog tot tussen skapieswolke
ek draai met oop polse na hom
& óns?
die oomblik los op
© Carina van der Walt, 2025