Gekanselleer
Haar ma het op veertig
uit ‘n sluimerslaap ontwaak.
Sy het weer gaan leer
eksamenskryf in klaslokale.
Haar ma groei tot ’n nuwe mens
terwyl haar middelkind
oor droë bossies struikel —
seer knieë op klip al meer verdik.
Haar ma is nou die keurder
en sy die manuskrip —
sy trek rooi kringe om die kind
se woorde. Wis hulle met kruise uit.
Sy maak bitsige
kantaantekeninge. Met pyltjies
skuif sy die kind
in lyn soos dit haar pas.
Die kind swyg,
maar snags skryf sy
wat haar mond verleer
in haar dagboek neer.
© Marthé McLoud, 2026