Hennie Nortjé. Hertzog-tertjies

 

Hertzog-tertjies

 

Het julle geweet dit was oorspronklik

‘n Bo-Kaapse lekkerny?

Genoem na Generaal Hertzog

maar ongelukkig met ‘n bitter

nasmaak daarby.

As destydse eerste minister,

is hy toe mos deur

al die bobaas baksters

so vereer uit pure dankbaarheid.

Want hand-en-mond het hy

stemreg belowe vir elke Eva,

insluitende bruin.

Maar toe hulle dit nie kry nie,

het daardie einste dames,

verstaanbaar moerig,

die tertjies herontwerp

deur die klapperskuim

met versiersuiker te vervang:

een kant wit,

die anderkant pienk

is dit tog te kostelik as

“tweegevreetjies”

landswyd bemark.

 

Maar die vooraanstaande generaal

kon die bespotting nie daar laat nie,

as geslepe militêre strateeg

het hy presies geweet

hoe om die volk terug te betaal:

 

Skenk vir die ganse santekraam

‘n uiters gesogte literêre prys

en laat hulle tot in lengte van dae

soos kat en hond daaroor baklei.

 

En nou met soveel kokke in die land

word die tertjies orals aangebrand.

Want wie weet watter sjef se bek

verdien die jam en watter gek,

verkies klappe bo klapper.

Ja, raak gerus maar boos

jou beskimmelde appelkoos,

maar onthou wat sê die wenresep:

Hier bak ons Hertzoggies

nie suurlemoentert.

 

© Hennie Nortjé, 2026