Johann Lodewyk Marais aangewys as feesdigter vir Innibos se 10de verjaarsdagviering

 

Nelspruit se Innibos-kultuurfees vier vanjaar hul 10de bestaansjaar en om dié geleentheid nog daardie tikseltjie ekstra plesier te gee, is dit die afgelope naweek bekend gemaak dat Johann Lodewyk Marais as feesdigter aangewys is. Die aanwys van ‘n feesdigter is natuurlik wêreldwyd ‘n algemene instelling met feeste, maar na die beste van my wete is dit die eerste keer dat daar ‘n fees hier ter plaatse is wat dié prysenswaardige stap neem.

En wie beter as Johann Lodewyk Marais?! Veral met ‘n fees soos Innibos waar hy met sy besonderse aanslag en tematiek soos ‘n loerie in die bos nommerpas vir dié feestelikheid gaan wees …

Volgens die berig wat in Beeld verskyn het, die volgende: “Benewens gedigte wat hy (Marais) spesiaal vir die fees geskryf het, sal hy op Vrydag 28 Junie om 11:00 ook in ’n program optree saam met Andries Bezuidenhout, Elize Cawood en Luna Paige. Bywoning is gratis, maar daar is slegs 100 plekke beskikbaar. Die geleentheid word aangebied by die Stoep-restaurant, net langs die feeskantoor. Cawood sal tydens die geleentheid van sy gedigte voorlees en Bezuidenhout sal ’n onderhoud met hom voer. Die program sal afgesluit word met Paige wat toonsettings van sy werk sal sing.”

Vreemd genoeg kon ek nêrens op Innibos se amptelike webtuiste iets van hierdie vreugde te lese vind nie; tensy ek rakelings gekyk het, natuurlik. ‘n Mens kan maar net hoop dat hulle nog daarby sal uitkom om die groot klok uit die stoor te haal en ordentlik blink te vryf vir dié feestelikheid. Die volgende aanhaling uit die organiseerders se feesbrief reflekteer darem in ‘n mate tog hul ingesteldheid: “Feeste het toenemend belangrik geword vir die ontwikkeling en voortbestaan van alle genres van kuns – veral in Afrikaans. Verder speel feeste ook ’n baie belangrike rol om Afrikaans as taal en ons kultuur te bevorder en te ontwikkel. Dit dien as platform vir kunstenaars om hulle kuns uit te leef en ook hul brood en botter te verdien.”

Vir jou leesplesier volg ‘n gedig van Johann Lodewyk Marais; ‘n gedig wat hy ‘n week of wat gelede op sy FaceBook-profiel geplaas het.

*

INNIBOS

Drie vroue dans ‘n Vrydagles
toe-oë, in capulanas
wat rooi en swart en plegtig pas
en die ritme van hulle dye hou.

“Hý wou sien,” sê Dan Dlamini
en sy vinger wys na my
wat volg hoe die vroue stof trap
in ‘n besielde raserny.

Die aanstigter slaan op ‘n trom:
al skriller en meegevoer
skuifel die voete uit die kring
en word die ritueel volvoer.

 

© Johann Lodewyk Marais

 

 

Bookmark and Share

6 Kommentare op “Johann Lodewyk Marais aangewys as feesdigter vir Innibos se 10de verjaarsdagviering”

  1. Johann de Lange :

    Baie geluk, Johann!

  2. Ons is besonder trots om Johann vanjaar as feesdigter by Innibos te vereer. Gaan lees gerus die blog daaroor by http://www.innibos.co.za/blog/entry/innibos-feesdigter.html. Hoop ons sien julle by Innibos!

  3. Philna Scholtz :

    Dit is op ons webtuiste onder Boeke Oppistoep. Die web se soekenjin sal jou ook direk soontoe neem. Om nog dimensies hieraan te verleen, het Innibos ook Beeldhouer Jaco Sieberhagen opdrag gegee om vier van Johann se gedigte as inspirasie vir sy kunswerke te gebruik. Hierdie uitstalling Woord in Beeld sal ook tydens Innibos te sien wees.

  4. Louis Esterhuizen :

    ‘n Fantastiese inisiatief, julle. Veels geluk daarmee …

  5. Philna Scholtz :

    Sien ook Innibos se webtuiste http://www.innibos.co.za onder “ANDER”, TOEKENNINGS vir ‘n volledige weergawe.

  6. Francis :

    Baie geluk Johann. Hierdie is werklik ‘n besonderse inisiatief en ‘n veer in die hoed vir jou.

  •