Jacobus van der Riet. Twee gedigte
Die Heilige Nuwemartelaar Johannes van Thasos,
die Kleremaker (oorl. 1652)
– Feesdag 20 Desember
Jy ken die prys van linne, damas en bombasyn,
jou vingers voel die verskil tussen moeslien en sis,
jy kan fluweel na waarde skat en ook pels en satyn,
dog onervare in die kuns van kibbel, begin jy twis,
jaag ‘n Joodse handelaar behoorlik die harnas in
juis toe die bilal met lang sillabes uit die minaret
‘n klankkokon oor Konstantinopel se koepels spin,
die vromes roep om neer te val, te buig in gebed.
Nou staan jy voor die Visier, van laster aangekla,
as sou jy kwansuis als wat vir ‘n Turk heilig is, haat.
Wat sal jy doen as hy van jou die Kruisverloëning vra
in ruil vir juwele en kussings van kalmink en brokaat?
Maar jy kan onderskei, Johannes, tussen katoen en sy,
voel hoe jou siel alreeds soos ‘n vlinder sy vlerke sprei.
*
Die Heilige Aleksander van Svir (1488-1533)
– Feesdag 30 Augustus
‘n Kersiebloeisel, ‘n sneeuvlok in die vlees,
loop jou hart vol soos ‘n oorvloedige meer
met die genade van die inwonende Gees,
Hy tot Wie jy jou telkens ootmoedig bekeer.
Kyk, skitterend wit soos ‘n blink vlaag wind
oor die water, verskyn hulle in heerlike lig,
die Drie wat een in Wese is en eensgesind,
die God op Wie jy jou hart reeds sestig jaar rig.
Hul woorde waai aan teen jou oor se drom:
soos fyn kapok wat aanpak op ‘n dennebol:
hier moet ‘n kalkwit kerk en klipklooster kom.
Nou rus jy in jou kis, volmaak gepreserveer,
Heilige Aleksander, in die ewige lente gestol,
ingelê in die genade van die Drie-enige Heer.
© Jacobus van der Riet / 2014
