Beginnend by die begin
Sy gedagtes het eienaardige vorms,
en party van hulle
pas netjies in mekaar
soos drie-dimensionele legkaartstukke,
molekules wat geure oordra
en knus pas in die vorms
van die regte senu-eindpunte
in die slymvlies van die neus.
Een besondere gedagte
kom nogal dikwels voor.
Dit is naastenby gevorm
soos ’n outydse tikmasjien
met bewegende toetse en rolstel.
Gewoonlik fladder hy vrolik rond
sonder om ’n spieëlbeeld
van homself te kry waarin hy kan pas.
Maar vanoggend loop hy hom vas
in so ’n gedagte,
alhoewel met ’n ander kleur –
elektries blou met ’n neiging
om te iridesseer.
Die twee smelt saam
met ’n klank soos die laaste bietjie water
wat uit die bad loop.
Die toetse begin beweeg
en die rolstel rol na regs.
Woorde verskyn:
Sy gedagtes het eienaardige vorms.
© De Waal Venter / 2017