Myrtle Theart. Pa se huis
Pa se huis
My eerste besoek in
Pa se huis
waar ek self moet oopsluit
Sy oë volg my
Ek hoor die bekende lag
as ek sy kondensmelkblik
agter boeke weggesteek kry
Daar is genoeg skaapvleis,
melk en eiers in die yskas,
krummelpap in die kastrol
om ons te laat aansit
by die gedekte tafel vir twee
Pa sal my mooi vra
om dié keer nie so haastig
te wees nie – ek sal instem
om die oorbekende stories
oor en oor te hoor
al voel ek vandag soos Pa se
blom- en groentetuin
wat verwese en wees
hangkop treur
Ek besweer my seer
deur jou kondensmelkblik
se soet te sluk, te drink op geluk
wiegend in die wiegstoel, in
Pa se huis
Hierdie gedig – ’n inskrywing vir die jaarlikse AVBOB Poësiekompetisie – is in die AVBOB Poësiebiblioteek gepubliseer, en word herpubliseer met toestemming van die AVBOB Poësieprojek. Klik hier om toegang tot meer as 17 000 gedigte in al 11 amptelike Suid-Afrikaanse tale te kry: https://www.avbobpoetry.co.za/Poem/ViewAll
