Die Wegmaking
oor dekades se verjaarsdae en krismisse
is persente fyn uitgesnuffel
met die hand uitgesoek
met sorg toegedraai
om presies die regte ding
in die mooiste pakkie
vir die geliefde persoon
te wees
geskenke is ‘n liefdestaal
so sê hulle
maar
mens kan net soveel saamvat
die kratte is klein en die kostes groot
alles wat nie weer daar
anderkant bekom kan word nie
moet hier weggemaak word
mens kan nie sentimenteel wees nie
die lewe is kort en die vlug is lank
alles wat nie saam na daar
anderkant gevlieg kan word nie
land hier op ‘n vullishoop
hulle gooi al my persente weg
© Mariëtte van Graan, 2023