Vlakvers
Die lyf is geheel-en-al kaal en grys.
Dis maar die vele poetse gebak,
al daardie komieklike aanhangsels,
wat hom so ’n kleurvolle vark maak:
Skurwelik vratsig,
oordadig bemaanhaar,
met weglê-snor-slagtande
agter ’n slordige bakkebaard.
Kompleet so in sy volle varklike glorie
het die ot my ’n oomblik begluur
en toe duidelik deur soveel
onwelvoeglike naamwoorde gewalg,
met koddige lugdraadstertjie orent
eerder die varkepad gevat
na die wyfie met die kleintjies,
dalk na ’n groendoring se wortels
of ondergrondse bunker …
Ja, asseblief tog enige ander plek
met beter ontvangs.
© Hennie Nortje, 2023. Noord van Malelane, Turksvy Publikasies
WOW, BRILJANT.