Franz Kafka
voor die Praagse
Indiese ink stokman
met ’n hart vol liefde
geleefde ironie
agter ’n lessenaar
regsgeleerde in diens van
die Arbeiter-Unfall-Versicherungs-Anstalt
für das Königreich Böhmen in Prag
in ’n laai die aandelesertifikaat in swaer
se asbesmyn
elke sintuig diensbaar
ingebreek tot handgereedskap
want taal is linosnee
jy verag geraas
dimensies in verkeerde hande
geneig om die roman
onvoltooid te laat
’n slot gee finale beslag
aan die begin
nie die kunswerk nie
maar die romansier
gefuik
op Praag se stasie
groet jy Felice Bauer
onverloofd op’n trein
terug na Berlyn
jy betaal met ’n long
peripatetikus
aankoms en vertrek
naamlangs onderneembaar
danksy Max Brod wat nooit
tot die suiwerheid van vuur
bekeer nie
oplaas met verteerde strot
kou kan jy nog
sluk
nie meer nie
na Hoffmann se sanatorium
net noord van Wene
Robert Klopstock en Dora Diamant
om jou bed
die honger
tussen drie verdeel
© Jacobus Swart, 2025
Treffend uitgebeeld. Jou vermoe om die essensie van ‘n lewe’ te omskryf is iets besonders vir my. En dan jou woordkeuse bly altyd by my, veral die gevoel wat daarmee saam kom.
Dankie. Jou gedigte inspireer my altyd opslag om te wil skryf en miskien eendag te dig.
Beste mnr. Scharn
Ek waardeer u kommentaar. Dankie dat u my werk gelees het.
Beste Jacobus Swart,
het leven van Kafka kort maar compleet weergegeven. Tientallen boeken hoeven nu niet meer gelezen te worden.