Bankroof
Uiteindelik kry Pa en ek plek op ’n nagtoer
by die SAP museum met sy gestolde misdaad.
Ons groep begin by die glaskaste
vol vervalste geld. “Party professioneel
en ander maar desperaat,” sê Pa
terwyl hy in sy skik na alles kyk.
Skielik storm daar rowers met balaklavas
en R1-gewere in. Hulle brul bevelend:
“Val plat!” Ek sien pa se pupille vergroot
soos ’n koedoe in visier. Ons sak stom
op ons mae neer. Ons monde droog. Die rowers
singel soos leeus uitgehonger vir hulle prooi.
Om die beurt hou hulle hul gewere
teen elkeen se kop. Sekure jagters
as jy sou beweeg. Ons lê doodstil.
We did not sign up for this
flits deur my kop. Dan onthou ek
ons getekende vrywaringsvorms.
Die rowers pluk hulle maskers af en lag:
“Welkom by die Polisiemuseum se nagtoer.”
© Marthé McLoud, 2025