Rivierkruising
Vandag het die Rivierman jou oor die water gedra
en my
op die rivieroewer
tussen die ruisende riete
en riviervoëls agtergelaat.
Die dood is ’n donker bos
waar die voëls
in ’n oertaal sing
en die nagte
stil om jou vou.
Plant vir ons ’n boom daar.
Wanneer die stam dik is, sal ek kom.
Jy sal my herken aan
die grys duifvere in my hare
en my skuifelstap.
Saam sal ons laag op laag
’n nuwe nes van riete vleg
sonder die aand se kennis —
net ons, die rivier en stilte.
© Marthé McLoud, 2026