Om te sien
glas spat paasnaweek
naby Palmietrivier
’n motor tot ’n vuis staal
saamgepers
die bestuurder opslag dood
stilte
twee maats oorleef —
sestienjaar oud
skokgolwe hardloop
die een seun
loop vir dekades
aan sy pa se arm
deur die strate van ons dorp
’n bekende gesig
met sy wit stok
voel-voel voor hom
by die skool tel ek die trappe
elke dag vyftien op tik
draai tik nog vyftien op tik
draai regs tik elf tree aan
tot by die Engelse-klas so tel ek
die treë na elke klas
sodat ek rigting kan hou
as God se hand my oë ook sluit
© Marthé McLoud, 2026