Gedigte

Ronel de Goede. Teddy & Nora

Monday, May 16th, 2022

 

Teddy & Nora

 

Teddy & Nora het saam gelewe

op Toys ‘R’ Us se uitverkooprak.

En toe bankrotskap die baas laat bewe,

ontsnap in ’n plastieksak.

 

Teddy & Nora het saam geswerwe;

honger gely in New York se strate.

Stry gekry – hul vryheid aan skerwe.

Gevang oor hul doene en late.

 

Teddy & Nora moes apart gaan woon

in ’n traliekamp vir emigrante.

Konsert gehou en met kos beloon

vir hul rolle as figurante.

 

Teddy moes jag in ’n Mowgli-oerwoud;

Nora moes duik in ’n Frozen-plaspoel.

Met drome en planne as hul enigste behoud,

en ontvlugting as hul opperste doel.

 

Teddy wou na sy voorsate gaan soek

deur te ryloop na ’n piekniekbos.

Nora wou vaar na ’n vreemde uithoek

met ’n sneeukoningin op ’n eenhoringros.

 

Teddy & Nora het apart gesterwe:

hy op ’n knersvlak, sy op smeltys.

Daar’s niks as hul stories om oor te erwe.

Net die waarheid as droefste bewys.

 

© Ronel de Goede

 

Joan Hambidge. oggendmeditasie 4

Sunday, May 15th, 2022

 

oggendmeditasie  4

 

Verloor my Mont Blanc-pen, ‘n cadeau

van haar, vind dit op ‘n ander plek gestoor:

met hierdie pen in ‘n kroeg, einste seimste

‘n weddenskap gewen: ein Meisterstück

 

korrek vertaal, want sy was ‘n Duitse nooi

wat immer lag oor my grammatika-boeke

(hoog opgestapel langs my bed ‘n berg)

met Nachfüllung vir dié pen so woekerend.

 

En vandat sy weg is, is hierdie pen op stuk

van sake, in kompetisie met ‘n potlood

en skerpmaker, wat ek draai en draai

om die grein van haar stem te ont-hoor.

 

© Joan Hambidge, 2022Hambidge, 2022

 

 

Willem M. Roggeman. Een oogopslag

Sunday, May 15th, 2022

 

Een oogopslag

 

Alles gebeurt tegelijkertijd en woelt

zonder ophouden, zonder rustpauze

wordt het in een oogopslag gevangen.

En de tuin mompelt onstuimig verder

omdat hij steeds weer in brand staat.

Zijn schuld, hij trekt overal vuur aan.

 

Daarom vermijdt de maan het landschap.

Valse schijn blijft onbeweeglijk hangen.

Een spiegel klappertandt tegen de muur.

Reikhalzend zet een trein zich in beweging

maar de regen laat overal littekens achter.

 

Zelfs het geroezemoes wordt nu zichtbaar.

Daar vloeit dan het alfabet weer uit voort.

 

© Willem M. Roggeman, 2022

 

Anton Dockel. Skynheilig

Sunday, May 15th, 2022

 

Skynheilig

 

Mantis sit en rondkyk wie sondig

voorpote soos hande tesame gesit

asof hy vroom vir sy slagoffers bid

voor hy hulle straf sal aankondig

 

© Anton Dockel, 2022

 

Mellet Moll. Wolodimir Zelenskij, 8 Mei 2022

Sunday, May 15th, 2022

 

Wolodimir Zelenskij, 8 Mei 2022*

 

Ek sien ‘n ander lente oor ons kom

ons Februarie breek in swart en wit.

Die môre vieruur val die eerste bom.

 

Die goue woorde van weleer is stom

die bloed van generasies in versnit.

Ek sien ‘n ander lente oor ons kom.

 

Ek plant vir jou ‘n laaste sonneblom

in Borodyanka waar ons grafte spit.

Die môre vieruur val die eerste bom.

 

By Moskou se parades klink die trom

en op die Rooi Plein loop hul in gelid.

Ek sien ‘n ander lente oor ons kom.

 

En in ons strate swerf die dood alom

die vyand neem die Donbas in besit.

Die môre vieruur val die eerste bom.

 

Ons sterfkennis is deesdae andersom

as Mariupol se dooies saam kom bid.

Ek sien ‘n ander lente oor ons kom.

Die môre vieruur val die eerste bom.

 

© Mellet Moll, 2022

 

 

Zelenskij se toespraak ter nagedagtenis aan Oorwinningsdag*

https://www.youtube.com/watch?v=CVlEkBHO_hc&ab_channel=news.com.au

 

Johann Lodewyk Marais. Papaja

Wednesday, May 11th, 2022

 

Papaja

Asimina friloba

 

Die papaja is ’n boot met die gloed

van die môreson oor die Lebombo’s

wat op houtstellasies van ʼn spaza

vaar met sy vrag roeiende Makondoʼs.

 

© Johann Lodewyk Marais, 2022

 

Joan Hambidge. Oggendmeditasie 3

Wednesday, May 11th, 2022

 

Oggendmeditasie 3

 

Die monodie in die Griekse tragedie,

‘n lament, oor die dood van ‘n ander.

George Steiner sou waarskynlik meen

nie sprake van soiets ná die 17e eeu.

 

Treurend oor jou in ons Ioniese drama:

Creusa versaak Ion en Hermes verklap

alles van Apollo se dade in ‘n grot …

Met ‘n terugkeer word ek dalk Pythia?

 

Jy verlaat my lank terug en voetspore

in ‘n herinneringsgrot die leidraad:

jou voete loop na ‘n Griekse eiland,

maar ek ontleed οἷα εἶναι δεῖ …

 

Euripides het dit reeds vertel: verraad

en versaking, immer met ‘n terugkeer

na die plek van skending of verminking:

in my grot van herinnering ‘n trenodie?

 

© Joan Hambidge, 2022

 

Johann Lodewyk Marais. Xavier Bolsonaro   

Tuesday, May 10th, 2022

 

Xavier Bolsonaro                      

            1955–

 

In die lug bo die reënwoud

hang die donker wolke van rook

en in ’n groter oopte knak

bome en val verpletterd neer.

 

Aras vlieg vreesbevange weg

en in knetterende vlamme

verkool tapir, lippebeer en boa

asof hulle bloot spesies was.

 

In São Paulo waai dié man sy hand

oor groen vlekke op ’n landkaart

en hou hom koel en berekend

vir die stamme se weeklaag doof.

 

© Johann Lodewyk Marais, 2022